ធនាគារពិភពលោក (World Bank) បាននិយាយនៅថ្ងៃពុធ ទី២២ មេសាថា បណ្តាប្រទេសកំពុងអភិវឌ្ឍ កំពុងតែបាត់បង់ប្រភពចំណូលដ៏សំខាន់មួយ ដោយសារជំងឺកូវីដ១៩។ ដើម្បីគ្រប់គ្រងមេរោគរាតត្បាត បណ្តាប្រទេសជាច្រើននៅទូទាំងពិភពលោក បានបិទទ្វារចាក់សោរប្រទេស និងក្រុងមនុស្សឲ្យនៅតែក្នុងផ្ទះ។ វិធានការនេះ កាត់បន្ថយយ៉ាងខ្លាំងនូវចរន្តសាច់ប្រាក់ ដែលកម្មករធ្វើការនៅបរទេស ផ្ទេរទៅកាន់ក្រុមគ្រួសារនៅឯប្រទេសកំណើត។
ការផ្ទេរសាច់ប្រាក់ ត្រូវគេរំពឹងថានឹងធ្លាក់ចុះប្រមាណជា ២០% នៅទូទាំងពិភពលោក ក្នុងឆ្នាំ២០២០ នេះ។ វា គឺជាការធ្លាក់ចុះដ៏ធំបំផុតមួយនៅក្នុងប្រវត្តិសាស្រ្តនាពេលថ្មីៗនេះ ដោយសារវិធានការបិទប្រទេស ដែលបណ្តាលឲ្យមានវិបត្តិសេដ្ឋកិច្ចសកល និងការបាត់បង់ការងារ។ ទាំងនេះ គឺជាឧបសគ្គរារាំងបុគ្គលិក-កម្មករ ដែលធ្វើការនៅបរទេស មិនអាចផ្ញើប្រាក់ទៅកាន់ក្រុមគ្រួសាររបស់ពួកគេនៅប្រទេសកំណើតបាន។
លោក David Malpass ប្រធានទូទៅរបស់ធនាគារពិភពលោក បាននិយាយនៅក្នុងសេចក្តីថ្លែងការណ៍មួយថា ការផ្ទេរប្រាក់ គឺជាប្រភពចំណូលដ៏សំខាន់សម្រាប់ប្រទេសកំពុងអភិវឌ្ឍ។ វិបត្តិសេដ្ឋកិច្ចដែលបណ្តាលមកពីកូវីដ១៩ កំពុងជះឥទ្ធិពលយ៉ាងខ្លាំងដល់ការផ្ញើប្រាក់ទៅប្រទេសកំណើត ហើយបញ្ហានេះទំនងជាមិនអាចដោះស្រាយបានក្នុងពេលឆាប់ៗនោះទេ។ នេះ គឺជាការបញ្ជាក់បន្ថែមរបស់លោក David Malpass។
បើតាមរបាយការណ៍របស់ធនាគារពិភពលោក ការផ្ទេរប្រាក់សរុប ទំនងជាធ្លាក់ចុះដល់ចំនួន ៤៤៥ ពាន់លានដុល្លារក្នុងឆ្នាំ២០២០ ពីចំនួន ៥៥៤ ពាន់លានដុល្លារក្នុងឆ្នាំ២០១៩។
យ៉ាងណាក៏ដោយ ក្នុងពេលមានវិបត្តិកូវីដ១៩ គេគិតថា ចរន្តផ្ទេរប្រាក់ នឹងនៅតែជាប្រភពចំណូលដ៏សំខាន់ និងកាន់តែសំខាន់លើសដើម សម្រាប់ក្រុមប្រទេសដែលមានប្រាក់ចំណូលទាប និងមធ្យម។ បើយោងតាមរបាយការណ៍ខាងលើដដែល នៅពេលមានវិបត្តិកូវីដ១៩ ការវិនិយោគផ្ទាល់ពីបរទេស នៅក្នុងប្រទេសមានប្រាក់ចំណូលទាប និងមធ្យម នឹងធ្លាក់ចុះ ហើយអាចធ្លាក់ចុះច្រើនជាង ៣៥%។
ទាក់ទងរឿងនេះ លោកឌីលីព រ៉ាដ្ឋា (Dilip Ratha) អ្នកដឹកនាំធ្វើរបាយការណ៍របស់ធនាគារពិភពលោក បានប្រាប់អ្នកយកព័ត៌មានថា ការធ្លាក់ចុះបែបនេះ ពិតជាមិនធ្លាប់មានពីមុនមកនោះទេនៅក្នុងប្រវត្តិសាស្ត្រ។ ជាមួយគ្នានេះ លោកបន្ថែមថា ការធ្វើចំណាកស្រុកក៏អាចនឹងធ្លាក់ចុះផងដែរដោយសារតែវិបត្តិកូវីដ១៩។
នៅក្នុងប្រទេសខ្លះ ការបាត់បង់ប្រាក់ទទួលបានពីបុគ្គលិកកម្មករនៅក្រៅប្រទេសមានចំនួនមួយភាគបួន ឬក៏សឹងស្មើមួយភាគបី នៃផលិតផលក្នុងស្រុកសរុប។ ប្រទេសទាំងនោះ មានជាអាទិ៍ ស៊ូដង់ខាងត្បូង ហៃទី នេប៉ាល់ និងតុងហ្គាជាដើម។
គួរគូសបញ្ជាក់ជូនថា លំហូរប្រាក់បញ្ញើ ត្រូវគេរំពឹងថានឹងធ្លាក់ចុះគួរឲ្យកត់សម្គាល់នៅអឺរ៉ុប និងអាស៊ីកណ្តាល ដែលមានចំនួនប្រមាណជា ២៧,៥% បន្ទាប់មកគឺអនុតំបន់អាហ្វ្រិកសាហារ៉ា មាន ២៣,១% ហើយនិងអាស៊ីបូព៌ានិងប៉ាស៊ីហ្វិកមានចំនួន ១៣ %៕
