សង្គ្រាមអ៊ុយក្រែន&រុស្ស៊ី៖ ពេលការលុកលុយរបស់រុស្ស៊ី ធ្វើឱ្យភ្លើងសង្គ្រាមនៅអ៊ុយក្រែនឆាបឆេះ និងបង្កឱ្យមានការព្រួយបារម្ភលើផ្នែកសន្តិសុខផ្សេងៗនៃប្រទេសអឺរ៉ុបទំនាក់ទំនងរវាងសហរដ្ឋអាមេរិក និងដៃគូសម្ព័ន្ធមិត្តត្រូវបានគេមើលឃើញថា ចាប់ផ្ដើមរស់រវើកឡើងវិញ ប៉ុន្តែភាពរកាំរកូសផ្ទៃក្នុង និងការពុតត្បុតនៃប្រទេសប៉ែកនេះក៏ត្រូវលាតត្រដាងឱ្យច្បាស់ផងដែរតាមរយៈនេះ។
ភ័ស្តុតាងនៃល្បឿនកម្លាំង និងការឯកភាពគ្នាក្នុងការឆ្លើយតបរបស់លោកខាងលិច ចំពោះការលុកលុយរបស់រុស្ស៊ីលើអ៊ុយក្រែន ធ្វើឱ្យវិមានក្រឹមឡាំងភ្ញាក់ផ្អើល ដោយរុស្ស៊ីត្រូវធ្លាក់ចូលក្នុងទណ្ឌកម្មរបស់លោកខាងលិចជុំទិស ដែលជាការបង្ហាញការគាំទ្រទៅចំពោះអ៊ុយក្រែន។
តាំងពីសង្គ្រាមចាប់ផ្ដើម លោកខាងលិចបានបង្កកទុនបម្រុងបរទេសរបស់ធនាគារកណ្ដាលរុស្ស៊ីជាងពាក់កណ្ដាល ដាក់ទណ្ឌកម្មស្ថាប័នហិរញ្ញវត្ថុ និងមហាសេដ្ឋីរុស្ស៊ីជាច្រើន បិទយន្តហោះរុស្ស៊ីមិនឱ្យឆ្លងដែនអាកាសអឺរ៉ុប ដាក់កម្រិតការនាំចេញបច្ចេកវិទ្យាទៅរុស្ស៊ីបណ្តេញរុស្ស៊ីចេញពីការប្រកួតបាល់ទាត់ពិភពលោក ការដកខ្លួនក្រុមហ៊ុនឯកជនអាមេរិកពីទឹកដីរុស្ស៊ី និងផ្អាកគម្រោងបំពង់បង្ហូរឧស្ម័នរុស្ស៊ី Nord Stream2 ទៅអាល្លឺម៉ង់ជាដើម។ លើសពីនេះ ក្រុមប្រទេសបស្ចិមលោកថែមទាំងបានផ្គត់ផ្គង់អ៊ុយក្រែនផ្នែកយោធានូវសព្វាវុធធុនធ្ងន់ និងស្រាល គិតជាថវិការាប់លានដុល្លារ។
ការលុកលុយរបស់រុស្ស៊ីមិនបានគំរាមកំហែងដល់ការវាតទីរបស់ណាតូទេ តែបែរជាបើកឱកាសឱ្យប្រទេសដទៃទៀត ពិចារណាលើការស្វែងរកសមាជិកភាពនៃសម្ព័ន្ធភាពយោធានេះវិញរួមមានទាំងហ្វាំងឡង់ និងប្រហែលជាស៊ុយអែតផង ដោយមើលឃើញពីហានិភ័យផ្សេងៗ។
អ្នកស្រី Margaret Macmillan ប្រវត្តិវិទូដ៏ល្បីឈ្មោះ ១ រូប និយាយប្រាប់កាសែត Financial Times ថា ខុសពីវិបត្តិអន្តរជាតិមុនៗ ដូចជាសង្គ្រាមនៅអ៊ីរ៉ាក់ការដកទ័ពរបស់អាមេរិកពីអាហ្វហ្គានីស្ថាន ឬការវាយប្រហាររបស់រុស្ស៊ីលើហ្ស៊កហ្ស៊ីក្នុងឆ្នាំ ២០០៨ ដែលបែងចែកសម្ព័ន្ធភាពលោកខាងលិច ឬបង្កការភ្ញាក់ផ្អើល សង្គ្រាមនៅអ៊ុយក្រែនបង្ហាញថា «លោកខាងលិចហាក់ដូចជាបានត្រៀមខ្លួន ហើយពិតជាបានគិតពីរបៀបដែលខ្លួននឹងឆ្លើយតប»។
លោក Norbert Rottgen សមាជិកសភាអាល្លឺម៉ង់និយាយថា៖ «ស្នូលនៃសារៈសំខាន់របស់អាមេរិកចំពោះសន្តិសុខអឺរ៉ុប ត្រូវបានបញ្ជាក់ឡើងវិញ។ អឺរ៉ុបយល់ដឹងកាន់តែច្រើនអំពីសារៈសំខាន់នៃសម្ព័ន្ធភាពជាមួយអាមេរិក ហើយអាមេរិកក៏ត្រូវរំឭកឡើងវិញពីសារៈសំខាន់នៃអឺរ៉ុប»។
ជាមួយគ្នានោះសម្ព័ន្ធមិត្តអាមេរិកនៅអាស៊ីរួមមាន ជប៉ុន កូរ៉េខាងត្បូង សិង្ហបុរី និងអូស្ត្រាលី បានចូលរួមដាក់ទណ្ឌកម្មប្រឆាំងនឹងរុស្ស៊ីជាមួយគ្នា។ ស្វ៊ីសដែលជាប្រទេសអព្យាក្រឹត និងជាមជ្ឈមណ្ឌលហិរញ្ញវត្ថុអន្តរជាតិដ៏សំខាន់ក៏ធ្វើដូចគ្នា។ តាមរយៈនេះអាមេរិកមានអារម្មណ៍ធូរស្រាលជាងមុនអំពីការដាក់ទណ្ឌកម្មលើធនាគារកណ្តាលរុស្ស៊ីដោយដឹងថា មជ្ឈមណ្ឌលហិរញ្ញវត្ថុធំៗផ្សេងទៀតរបស់ពិភពលោក កំពុងធ្វើសកម្មភាពជាមួយខ្លួន។
យ៉ាងណាមិញខណៈដែលទំនាក់ទំនងរវាងសហរដ្ឋអាមេរិក និងសម្ព័ន្ធមិត្ត ជាពិសេសសហភាពអឺរ៉ុប មានការស្រុះស្រួលគ្នាក៏មានគំនិតមួយដែលផុសជាមួយនឹងសុទិដ្ឋិនិយមនេះថា ការរួបរួមរបស់លោកខាងលិចអាចមានភាពផុយស្រួយ និងមិនបានយូរទេ។
នៅក្នុងសហភាពអឺរ៉ុបការព្រួយបារម្ភកើតឡើងចំពោះប្រទេសបារាំង ដោយថា ប្រសិនបើលោកស្រី ម៉ារីន ឡឺប៉ែន ដែលមានទំនោរទៅរុស្ស៊ី ហើយមានអតីតកាលរកាំរកូសជាមួយប្លុក និងអង្គការណាតូ ជាប់ឆ្នោតជាប្រធានាធិបតីនោះ ទំនាក់ទំនងរវាងលោកខាងលិចក្នុងតំបន់អឺរ៉ុបនឹងកើតមានអរិភាព។ លើសពីនេះ ភាពភ័យខ្លាចសម្រាប់មន្ត្រីសហភាពអឺរ៉ុប និងណាតូ ក៏កើតមានផងដែរ ជុំវិញលទ្ធភាពនៃការវិលត្រឡប់មកកាន់អំណាចវិញរបស់លោក ដូណាល់ ត្រាំ តាមការបោះឆ្នោតឆ្នាំ ២០២៤។
ប៉ុន្តែបើទោះបីជាលោក ត្រាំ ឬលោកស្រី ឡឺប៉ែន មិនកាន់អំណាចក៏ដោយ ក៏បញ្ហាមិនចុះសម្រុងនៅក្នុងប្លុកអឺរ៉ុបមានរួចស្រេចទៅហើយដូចជាការរិះគន់របស់លោក ម៉ាក្រុង លើរដ្ឋាភិបាលប៉ូឡូញ ជុំវិញការបិទសិទ្ធិអ្នកស្រឡាញ់ភេទដូចគ្នា ក្រោយនាយករដ្ឋមន្ត្រីប៉ូឡូញរិះគន់កិច្ចសន្ទនាតាមទូរស័ព្ទ របស់មេដឹកនាំបារាំងនឹងលោក ពូទីន ច្រើនដង បញ្ហាមិនចុះសម្រុងគ្នាលើទណ្ឌកម្មបិទការនាំចូលថាមពលពីរុស្ស៊ី និងការកើនឡើងនៃអតិផរណាក្នុងប្រទេសនីមួយៗជាដើម។
វាក៏មានចំណុចមួយដែលលើកឡើងថា ការអះអាងរបស់លោកខាងលិចថាពិភពលោករួមដៃគ្នាថ្កោលទោសរុស្ស៊ី គឺជារឿងមិនពិត ដូចបង្ហាញឱ្យឃើញតាមរយៈការបោះឆ្នោតនៅមហាសន្និបាតអង្គការសហប្រជាជាតិដែលប្រទេសសំខាន់ៗដូចជាចិន ប្រេស៊ីល អាហ្វ្រិកខាងត្បូង និងឥណ្ឌា ដែលមានប្រជាជនច្រើនជាងពាក់កណ្ដាលពិភពលោកបោះឆ្នោតប្រឆាំង និងអនុបវាទក្នុងសន្និបាត។
ឥណ្ឌាដែលជាសមាជិកនៃចតុប្រទេស Quad និងពឹងផ្អែកយ៉ាងខ្លាំងលើសព្វាវុធរុស្ស៊ី មិនបានចូលរួមជាមួយសមាជិកអាមេរិក អូស្ត្រាលី និងជប៉ុន ដាក់ទណ្ឌកម្មលើក្រុងម៉ូស្គូនោះទេ។ ចំណែក ប្រទេសផ្ដាច់ការនៅឈូងសមុទ្រពែរ៍ក្ស ដូចជាអារ៉ាប់រួម និងអារ៉ាប៊ី សាអ៊ូឌីត ដែលជាសំណព្វចិត្តរបស់លោកខាងលិចខាងផ្គត់ផ្គង់ប្រេង ក៏បោះឆ្នោតអនុបវាទនៅអង្គការសហប្រជាជាតិ ដោយមិនប្រកាន់ជំហរជាមួយលោកខាងលិច។
កំណត់ត្រាមិនចុះសម្រុងទាំងអស់នេះ គូសបញ្ជាក់ថា ការអះអាងដំបូងរបស់លោកខាងលិចថា ពិភពលោករួបរួមគ្នាប្រឆាំងរុស្ស៊ី គឺជាការបំភាន់។ លើសពីនេះទៀត អ្នកវិភាគមួយចំនួនក៏គាស់កកាយអំពីការលាក់ពុតរបស់លោកខាងលិច ដូចជាការផ្ដល់ការយកចិត្តទុកដាក់តិចតួចក្នុងប្រទេសមានអាសន្នផ្សេងទៀតដូចជាយេម៉ែន អាហ្វហ្គានីស្ថាន និងអេត្យូពី ឬការយកខ្លួនត្រូវចំពោះការអន្តរាគមន៍ដែលសម្លាប់មនុស្សស្លូតត្រង់ជាច្រើននៅមជ្ឈិមបូព៌ាជាដើម៕
