សហរដ្ឋអាម៉េរិកនៅតែរក្សាការប្តេជ្ញាចិត្តចំពោះការការពារប្រទេសហ្វីលីពីន រួមទាំងសមុទ្រចិនខាងត្បូង

សហរដ្ឋអាម៉េរិក និងហ្វីលីពីន បានអះអាងសាជាថ្មីអំពីសម្ព័ន្ធភាពសន្តិសុខដែលមានអាយុកាលរាប់សិបទសវត្សរ៍របស់ពួកគេកាលពីថ្ងៃចន្ទទី ១ ខែឧសភា។ ប្រធានាធិបតីអាម៉េរិក ​លោក ចូ បៃឌិន (Joe Biden) បានប្រាប់មេដឹកនាំហ្វីលីពីន លោក ហ្វើឌីណាន់ ម៉ាកូស ជេអរ (Ferdinand Marcos Jr) ថា ការប្តេជ្ញាចិត្តរបស់សហរដ្ឋអាម៉េរិកចំពោះការការពារសម្ព័ន្ធមិត្តរបស់ខ្លួនគឺរឹងមាំ រួមទាំងនៅក្នុងសមុទ្រចិនខាងត្បូង។

លោក ម៉ាកូស ដែលជាមេដឹកនាំហ្វីលីពីនធ្វើដំណើរទស្សនកិច្ចលើកដំបូងនៅសេតវិមានក្នុងរយៈពេល ១០  ឆ្នាំ បានសង្កត់ធ្ងន់លើសារសំខាន់នៃសហរដ្ឋអាម៉េរិកក្នុងនាមជាសម្ព័ន្ធមិត្តសន្ធិសញ្ញាតែមួយគត់របស់ប្រទេសរបស់លោកនៅក្នុងតំបន់ដែលមានស្ថានភាពភូមិសាស្ត្រនយោបាយដ៏ស្មុគស្មាញ

បំផុតនៅលើពិភពលោកនាពេលបច្ចុប្បន្ន។

ការធ្វើដំណើរទស្សនកិច្ចនេះគឺជាការផ្លាស់ប្ដូរយ៉ាងខ្លាំងនៅក្នុងទំនាក់ទំនងរវាងសហរដ្ឋអាម៉េរិក និងហ្វីលីពីន ខណៈដែលប្រទេសទាំងពីរស្វែងរកវិធីដើម្បីប្រឆាំងនឹងអ្វីដែលពួកគេមើលឃើញថាជាសកម្មភាពឈ្លានពានកាន់តែខ្លាំងឡើងរបស់ចិននៅជិតកោះតៃវ៉ាន់ និងនៅក្នុងសមុទ្រចិនខាងត្បូង។
លោក ហ្វើឌីណាន់ ម៉ាកូស ជេអរ  (ឆ្វេង) លោក ចូ បៃឌិន
លោក ហ្វើឌីណាន់ ម៉ាកូស ជេអរ  (ឆ្វេង) លោក ចូ បៃឌិន

មន្ត្រីសហរដ្ឋអាម៉េរិកបាននិយាយថា មេដឹកនាំនឹងយល់ព្រមលើគោលការណ៍ណែនាំថ្មីសម្រាប់កិច្ចសហប្រតិបត្តិការយោធាកាន់តែខ្លាំង ក៏ដូចជាការបង្កើនកិច្ចសហប្រតិបត្តិការសេដ្ឋកិច្ចផងដែរ។ ចំណែកឯ លោក បៃឌិន បានប្រាប់លោក ម៉ាកូស នៅក្នុងការិយាល័យប្រជុំផ្លូវការថា ៖«សហរដ្ឋអាម៉េរិកនៅតែរក្សាការប្តេជ្ញាចិត្តរបស់យើងចំពោះការការពារប្រទេសហ្វីលីពីន រួមទាំងសមុទ្រចិនខាងត្បូង»។

សេចក្តីថ្លែងការណ៍រួមមួយបានបង្ហាញថា ការវាយប្រហារប្រដាប់អាវុធណាមួយលើកងកម្លាំងប្រដាប់អាវុធហ្វីលីពីន នាវាសាធារណៈ ឬយន្តហោះនៅប៉ាស៊ីហ្វិក រួមទាំងនៅសមុទ្រចិនខាងត្បូង នឹងអំពាវនាវឱ្យមានការប្តេជ្ញាចិត្តការពារគ្នាទៅវិញទៅមករបស់សហរដ្ឋអាម៉េរិកក្រោមសន្ធិសញ្ញាការពារគ្នាទៅវិញទៅមកឆ្នាំ ១៩៥១ ។

ទីក្រុងវ៉ាស៊ីនតោន បានឱ្យដឹងថា ប្រទេសហ្វីលីពីន គឺជាគន្លឹះនៃកិច្ចខិតខំប្រឹងប្រែងមួយ ដើម្បីប្រឆាំងនឹងការឈ្លានពានរបស់កោះតៃវ៉ាន់ ដោយប្រទេសចិនដែលតែងតែអះអាងកោះនេះជាទឹកដីរបស់ខ្លួន។ ថ្មីៗនេះ ទីក្រុងម៉ានីលបានយល់ព្រមអនុញ្ញាតឱ្យសហរដ្ឋអាម៉េរិកចូលទៅកាន់មូលដ្ឋានយោធាចំនួនបួនបន្ថែមទៀតនៃមូលដ្ឋានយោធារបស់ខ្លួនក្រោមកិច្ចព្រមព្រៀងពង្រឹងកិច្ចសហប្រតិបត្តិការការពារជាតិ ប៉ុន្តែភាគីទាំងពីរមិនបានលើកឡើងថាទ្រព្យសម្បត្តិយោធារបស់សហរដ្ឋអាម៉េរិកនឹងត្រូវដាក់នៅទីតាំងទាំងនោះនោះទេ។

សេចក្តីថ្លែងការណ៍រួមបានបញ្ជាក់ថា ៖«មេដឹកនាំទាំងពីរ បញ្ជាក់ពីសារសំខាន់នៃការរក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ដែលជាធាតុដែលមិនអាចខ្វះបាននៃសន្តិសុខ និងវិបុលភាពពិភពលោក»។ ខណៈពេលដែល មន្ត្រីសហរដ្ឋអាម៉េរិកបាននិយាយថា គោលការណ៍ណែនាំថ្មីផ្តោតលើការសម្របសម្រួលយោធានៅទូទាំងដែនគោក ដែនសមុទ្រ អាកាស លំហ និងអ៊ីនធឺណេត ខណៈដែលរដ្ឋបាលអាម៉េរិកក៏នឹងផ្ទេរយន្តហោះ C-130 ចំនួនបីគ្រឿង ហើយនឹងបញ្ជូននាវាល្បាតបន្ថែមទៀតទៅកាន់ហ្វីលីពីន។

លោក ម៉ាកូស បានសង្កត់ធ្ងន់ថា ៖«វាគ្រាន់តែជារឿងធម្មតាៗសម្រាប់ហ្វីលីពីនក្នុងការសម្លឹងមើលដៃគូសន្ធិសញ្ញាតែមួយគត់របស់ខ្លួននៅក្នុងពិភពលោកដើម្បីពង្រឹង និងកំណត់ឡើងវិញនូវទំនាក់ទំនងដែលយើងមាន និងតួនាទីក្នុងការប្រឈមមុខនឹងភាពតានតឹងដែលកំពុងកើនឡើងដែលយើងឃើញនៅពេលនេះនៅជុំវិញសមុទ្រចិនខាងត្បូង អាស៊ី​ប៉ាស៊ីហ្វិក និង​តំបន់​ឥណ្ឌូ​ប៉ាស៊ីហ្វិក»។

កិច្ចប្រជុំកំពូលនេះគឺជាចំណុចដ៏រសើបនៃដំណើរទស្សនកិច្ចរយៈពេលបួនថ្ងៃរបស់ប្រធានាធិបតីហ្វីលីពីនទៅកាន់សហរដ្ឋអាម៉េរិក ដែលបានចាប់ផ្តើមកាលពីថ្ងៃអាទិត្យទី ៣០ ខែមេសា។ លោក ម៉ាកូស បានស្វែងរកទំនាក់ទំនងដ៏កក់ក្ដៅជាមួយសហរដ្ឋអាម៉េរិក និងចិន ដែលកំពុងតែប្រជែងគ្នាដណ្តើមឥទ្ធិពលនៅក្នុងឥណ្ឌូប៉ាស៊ីហ្វិក។

អ្នកជំនាញបាននិយាយថា ទីក្រុងវ៉ាស៊ីនតោនចាត់ទុកហ្វីលីពីនជាទីតាំងដ៏មានសក្តានុពលសម្រាប់ប្រព័ន្ធរ៉ុក្កែត មីស៊ីល និងកាំភ្លើងធំ ដើម្បីទប់ទល់នឹងការវាយលុករបស់ចិនលើកោះតៃវ៉ាន់។ ទោះបីជាយ៉ាងណាក៏ដោយ លោក ម៉ាកូស បានប្រាប់អ្នកយកព័ត៌មាននៅលើយន្តហោះរបស់លោកថា ប្រទេសចិនបានយល់ព្រមពិភាក្សាអំពីសិទ្ធិនេសាទនៅក្នុងសមុទ្រចិនខាងត្បូង ហើយថាលោកនឹងមិនអនុញ្ញាតឱ្យហ្វីលីពីនក្លាយជាកន្លែងឈរជើង សម្រាប់សកម្មភាពយោធានោះទេ។

ទន្ទឹមនឹងនោះ សេចក្តីថ្លែងការណ៍រួមបានបញ្ជាក់ថា លោក បៃឌិន នឹងបញ្ជូនបេសកកម្មពាណិជ្ជកម្ម និងវិនិយោគទៅកាន់ប្រទេសហ្វីលីពីន ដើម្បីបង្កើនការវិនិយោគក្នុងការផ្លាស់ប្ដូរថាមពលស្អាត វិស័យរ៉ែសំខាន់ៗ និងសន្តិសុខស្បៀងអាហារ។ ប្រទេសទាំងពីរក៏នឹងធ្វើជាម្ចាស់ផ្ទះរួមគ្នានៅទីក្រុងម៉ានីលផងដែរនូវវេទិកាធុរកិច្ចឥណ្ឌូប៉ាស៊ីហ្វិកឆ្នាំ ២០២៤ ដែលជាព្រឹត្តិការណ៍ពាណិជ្ជកម្មរបស់សហរដ្ឋអាម៉េរិកនៅក្នុងតំបន់ដែលនឹងបន្តបង្កើតហ្វីលីពីនជាមជ្ឈមណ្ឌលសំខាន់សម្រាប់ខ្សែសង្វាក់ផ្គត់ផ្គង់ក្នុងតំបន់។

មិនត្រឹមតែប៉ុណ្ណោះ សេចក្តីថ្លែងការណ៍ក៏បានរំលេចផងដែរថា ប្រទេសនានាទន្ទឹងរង់ចាំការបង្កើតកិច្ចសហប្រតិបត្តិការត្រីភាគីជាមួយជប៉ុន និងអូស្ត្រាលី។ ដោយមានប្រជាជនហ្វីលីពីនជាច្រើនមានការខកចិត្តចំពោះសកម្មភាពរបស់ចិននៅសមុទ្រចិនខាងត្បូង រួមទាំងការយាយីកប៉ាល់ហ្វីលីពីន និងអ្នកនេសាទនៅក្នុងផ្នែកដែលប្រទេសទាំងពីរអះអាង ការគាំទ្រដ៏ពេញនិយមបានកើនឡើងនៅក្នុងប្រទេសហ្វីលីពីនសម្រាប់ជំហរតឹងរ៉ឹងចំពោះទីក្រុងប៉េកាំង៕