កណ្តាល៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ដើម្បីឲ្យប្រទេសមួយអភិវឌ្ឍន៍ ដើម្បីឲ្យប្រទេសមួយមានការជឿនលឿន ដើម្បីឲ្យមានការងារធ្វើដោយសុវត្ថិភាព ដែលបង្កើតការងារធ្វើបន្ថែម រឿងធំជាងគេគឺសន្តិភាព បើអត់សន្តិភាពទេកុំនិយាយរឿងដល់ការងារ រត់តែចូលត្រង់សេ។ សម្តេចបានលេីកឡេីងដូចនេះ ក្នុងឱកាសសំណេះសំណាលជាមួយកម្មករនិយោជិតប្រមាណជិត២ម៉ឺននាក់ មកពីខេត្តកណ្តាល និងភ្នំពេញ នៅព្រឹកថ្ងៃ ទី២៤ ខែមិថុនា ឆ្នាំ២០២៣។
សម្តេចតេជោ ហ៊ុន សែន បានបញ្ជាក់ថា៖ «សូមក្មួយៗមើលប្រទេសនានាដែលមានសង្គ្រាមតើគេទទួលបានអ្វី ដូចជាកម្ពុជាខ្លួនឯងធ្លាប់ជួបប្រទះ ឃើញកាលពីសង្គ្រាមគិតតែពីរត់ និងបាញ់សម្លាប់គ្នា។ ប្រទេសយើងបានហែកហួរជាជម្រៀកៗ សម្លាប់គ្នារហូតដល់បាត់បង់មនុស្ស ពីឆ្នាំ១៩៧០ ដល់៧៥ ស្លាប់ប្រហែលជាកន្លះលាននាក់ ហើយពី១៩៧៥ ដល់៧៩ ស្លាប់អស់៣លាននាក់»។
សម្ដេចតេជោ ហ៊ុន សែន ក៏បានលើកឡើងដែរថា ឆ្នាំ១៩៧៩ មានមនុស្សត្រឹមតែជុំវិញប្រាំលាននាក់តែប៉ុណ្ណោះ ប៉ុន្តែឥឡូវឡើងដល់១៧លាននាក់ទៅហើយ។ ដោយសារមនុស្សកាន់តែច្រើន រាជរដ្ឋាភិបាលកំណត់ថា ក្នុងមួយឆ្នាំយ៉ាងហោចណាស់ ត្រូវតែបង្កើតការងារឲ្យបានពី២០ ទៅ៣០ម៉ឺន កន្លែង។ ក្រៅពីនេះក៏មានគោលដៅត្រូវដោះស្រាយ ក្នុងមួយអាណត្តិរបស់រាជរដ្ឋាភិបាល ដែលមានរយៈពេលប្រាំឆ្នាំ ត្រូវបង្កើតការងារឲ្យបាន ១លានប្រាំសែនកន្លែង។ គោលដៅនេះនឹងផ្តល់ និងទទួលចេញប្រាក់បណ្ដុះបណ្ដាល វិជ្ជាជីវៈសម្រាប់អ្នកក្រីក្រផងដែរ។ នេះគឺជាកម្មវិធីជាក់លាក់ដែលបានដាក់ចេញសម្រាប់បម្រើឲ្យការអភិវឌ្ឍ។
ក្រៅពីនេះសម្តេចតេជោ ហ៊ុន សែន ក៏បានលេីកឡេីងដែរថា រាជរដ្ឋាភិបាលនឹងរៀបចំប្រព័ន្ធផ្លូវប្រព័ន្ធទឹក ប្រព័ន្ធភ្លើង ឲ្យបានកាន់តែប្រសើរទាក់ទាញអ្នកវិនិយោគ ពិសេសមកធ្វើការកែច្នៃកសិផលដែលមានស្រាប់ ដែលកម្ពុជាមានសម្បូរដោយវត្ថុធាតុដើម ប៉ុន្តែដោយសារខ្វះការកែច្នៃ៕
អត្ថបទ៖ ហ៊ន សុភ័ក្រ
