ភ្នំពេញៈ ការដោះដូរពាណិជ្ជកម្មសរុបរបស់កម្ពុជាជាមួយបណ្តាប្រទេសសមាជិកអាស៊ានសម្រេចបានជាង ៧,១ ពាន់លានដុល្លារ ក្នុងឆមាសទី១ ធ្លាក់ចុះប្រមាណ ១៧ ភាគរយ ខណៈដែលការនាំចេញសរុបបានកើនឡើងយ៉ាងខ្លាំងចំនួន ៣៦ ភាគរយ។
យោងតាមអគ្គនាយកដ្ឋានគយ និងរដ្ឋាករបានឱ្យដឹងថា ទំហំពាណិជ្ជកម្មសរុបរបស់កម្ពុជាជាមួយប្រទេសសមាជិកអាស៊ានចំនួន ៩ បានធ្លាក់ចុះ ១៧ ភាគរយ នៅក្នុងឆមាសទី១ ដោយសម្រេចបានទឹកប្រាក់ ៧,១៣៩ ពាន់លានដុល្លារ។ ក្នុងនោះ ការនាំចេញសរុបរបស់កម្ពុជាឈានដល់ ២,៤៨១ ពាន់លានដុល្លារ កើនឡើង ៣៦ ភាគរយ ខណៈការនាំចូលសរុបមាន ៤,៦៥៩ ពាន់លានដុល្លារ ធ្លាក់ចុះ ៣១ ភាគរយ។
ជាមួយនឹងពាណិជ្ជកម្មសរុបនេះ ការដោះដូរទំនិញជាមួយប្រទេសវៀតណាមជាប់ចំណាត់ថ្នាក់កំពូលបានឈានដល់ជាង ៣,៣ ពាន់លានដុល្លារ (កើនឡើង ១ ភាគរយ); តាមពីក្រោយដោយប្រទេសថៃ ទទួល បាន ១,០៧៥ ពាន់លានដុល្លារ (ធ្លាក់ចុះ ១៤ ភាគរយ); ប្រទេសសិង្ហបុរី មានចំនួនជាង ៧៨៦ លានដុល្លារ (ធ្លាក់ចុះ ៦២ ភាគរយ); ឥណ្ឌូនេស៊ីមានជាង ៥៩៤ លានដុល្លារ (កើនឡើង ២៨ ភាគរយ); ប្រទេសម៉ាឡេស៊ី មានចំនួន ៣១៧ លានដុល្លារ (ធ្លាក់ចុះ ៣ ភាគរយ); ប្រទេសឡាវ មានចំនួនជាង ៩៣ លានដុល្លារ (ធ្លាក់ចុះ ១៣ ភាគរយ); ប្រទេសហ្វីលីពីនគឺ ៤២,៧៨ លានដុល្លារ (ធ្លាក់ចុះ ៣៣ ភាគរយ); ប្រទេសមីយ៉ាន់ម៉ា មានចំនួន ១៤ លានដុល្លារ (កើនឡើង ២ ភាគរយ); និងប្រ៊ុយណេមានចំនួន ១២,៨១ លានដុល្លារ (កើនឡើង ១៣ ភាគរយ)។
លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ កាលពីថ្ងៃទី ២៣ ខែកក្កដាថា ការធ្លាក់ចុះនៃការដោះដូរទំនិញរបស់កម្ពុជាជាមួយប្រទេសសមាជិកអាស៊ានដោយសារតែការអូសបន្លាយនៃសង្គ្រាមរុស្ស៊ី និងអ៊ុយក្រែន ដែលប៉ះពាល់ដល់តម្រូវការក្នុងតំបន់ និងពិភពលោក។
លោកបានថ្លែងថា៖ «យើងឃើញថា ការអូសបន្លាយពេលនៃសង្គ្រាមរវាងរុស្ស៊ី និងអ៊ុយក្រែន គឺជាឧបសគ្គដ៏សំខាន់ដែលប៉ះពាល់ដល់ការប្រើប្រាស់របស់ប្រជាជន ខណៈដែលទីផ្សារអាស៊ានភាគច្រើនយើងបំពេញគ្នាទៅវិញទៅមក។ នៅពេលណាដែលមានការធ្លាក់ចុះនៃតម្រូវការសកល វាក៏ប៉ះពាល់ដល់ការផ្លាស់ប្តូរពាណិជ្ជកម្មរបស់យើងនៅក្នុងតំបន់ផងដែរ»។
បើតាមលោក សុវិជាតិ ការផ្លាស់ប្តូរពាណិជ្ជកម្មភាគច្រើនរវាងកម្ពុជា និងប្រជាជាតិអាស៊ានផ្សេងទៀត ភាគច្រើនជាផលិតផលកសិកម្ម និងសម្ភារកាត់ដេរមួយចំនួនស្របពេលដែលការនាំចូលផលិតផលកសិកម្មសម្រេច សម្ភារម្ហូបអាហារ គ្រឿងអេឡិចត្រូនិក និងរថយន្ត។
លោក គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានមានប្រសាសន៍ថា ទីផ្សារអាស៊ាននៅតែជាដៃគូពាណិជ្ជកម្មសម្រាប់ផលិតផលកសិកម្មរបស់កម្ពុជា ខណៈដែលប្រទេសអាស៊ានភាគច្រើន គឺបំពេញគ្នាទៅវិញទៅមក។
លោកបានថ្លែងបន្តទៀតថា៖ «យើងត្រូវមើលថា ប្រទេសអាស៊ានភាគច្រើនផលិតផលិតផលដូចគ្នាសម្រាប់ការនាំចេញ ប៉ុន្តែអ្វីដែលយើងត្រូវដឹង គឺយើងត្រូវបំពេញឱ្យគ្នាទៅវិញ ទៅមកដោយមិនប្រកួតប្រជែងគ្នាឡើយព្រោះយើងនាំចេញផលិតផលទៅកាន់ទីផ្សារស្ទើរតែដូចគ្នាទាំងអស់»។
លោកបានបញ្ជាក់បន្ថែមថា៖ «ទោះបីយើងផលិតផលិតផលស្ទើរតែដូចគ្នា ប៉ុន្តែប្រសិនបើសមាជិកណាខ្វះវត្ថុធាតុដើម ពួកគេប្រាកដជានាំចូលពីយើង ខណៈយើងក៏នាំចូលផលិតផលខ្លះដែលយើងមិនផលិត ដើម្បីបំពេញតម្រូវការក្នុងស្រុកផងដែរ»។
បើយោងតាមរបាយការណ៍ក្រសួងពាណិជ្ជកម្មបានឱ្យដឹងថា កម្ពុជាបាននាំចេញកសិផល សម្លៀកបំពាក់ ស្បែកជើង កាបូប គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ខណៈដែលការនាំចូលមានដូចជាចំណីអាហារ ភេសជ្ជៈ ឧបករណ៍អគ្គិសនី និងអេឡិចត្រូនិក សម្ភារសំណង់ គ្រឿងយន្តកសិកម្ម និងយានជំនិះ៕
