ភ្នំពេញៈ ការនាំទំនិញចេញ-ចូលរវាងប្រទេសកម្ពុជា និងប្រទេសកាណាដា ក្នុងឆមាសទី១ ឆ្នាំ ២០២៣ មានទឹកប្រាក់ជាង ៤៤៤លានដុល្លារ ធ្លាក់ចុះជិត ១/៤ ដងបើធៀបរយៈពេលដូចគ្នាឆ្នាំ ២០២២ ខណៈកាណាដាគឺជាប្រទេសមានទំហំពាណិជ្ជកម្មទ្វេភាគីធំជាងគេទី៩ របស់កម្ពុជា។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
តារាងស្ថិតិពាណិជ្ជកម្មអន្តរជាតិកម្ពុជា ឱ្យដឹងថា ក្នុងរយៈពេល ៦ ខែ ពីខែមករា-ខែមិថុនា ឆ្នាំ ២០២៣ ពាណិជ្ជកម្មទ្វេភាគីកម្ពុជា-កាណាដា មានទឹកប្រាក់សរុប ៤៤៤,៦១ លានដុល្លារ ធ្លាក់ចុះ ២៣,៧ ភាគរយធៀបរយៈពេលដូចគ្នាក្នុងឆ្នាំ ២០២២ ដែលមានចំនួន ៥៨៣,០៤ លានដុល្លារ។ ក្នុងនោះទំនិញកម្ពុជានាំទៅកាណាដា ចំនួន ៤១៦,៩៩ លានដុល្លារ ធ្លាក់ចុះ ២៦,៧ ភាគរយ និងកាណាដានាំមកកម្ពុជា ២៧,៦១ លានដុល្លារ កើនឡើង ៩៩,៥ ភាគរយ។ តាមរយៈទិន្នន័យ គឺជញ្ជីងពាណិជ្ជកម្មកម្ពុជា មានឧត្តមភាព ៣៨៩,៣៨ លានដុល្លារ។
ផ្អែកតាមទិន្នន័យខាងលើ គឺទំហំពាណិជ្ជកម្មកម្ពុជា-កាណាដា ក្នុងឆមាសទី ១ ឆ្នាំ ២០២៣ ស្មើនឹង ១,៨៨ ភាគរយនៅក្នុងចំណោមទំហំពាណិជ្ជកម្មអន្តរជាតិរបស់កម្ពុជាដែលមានសរុប ២៣ ៦៩៣,៦៦ លានដុល្លារ។
តារាងខាងលើឱ្យដឹងទៀតថា សម្រាប់ខែមិថុនា ឆ្នាំ ២០២៣ ពាណិជ្ជកម្មរវាងប្រទេសទាំង ២ មានសរុប ១១២,៤២ លានដុល្លារ ធ្លាក់ចុះ ៧,៤២ភាគរយ ដោយកម្ពុជានាំទៅកាណាដា ៩២,៩១ លានដុល្លារ ធ្លាក់ចុះ ២០,៩ ភាគរយ និងបាននាំចូល ១៩,៥២ លានដុល្លារ កើនឡើង ៤២៤,៩ ភាគរយ។
អនុប្រធានសភាពាណិជ្ជកម្មកម្ពុជា លោក លឹម ហេង ឱ្យដឹងថា ការធ្លាក់ចុះទំហំពាណិជ្ជកម្មទ្វេភាគី ពិសេសការនាំចេញពីកម្ពុជា គឺដោយសារស្ថានភាពសេដ្ឋកិច្ចពិភពលោក រួមទាំងប្រទេសកាណាដាមិនសូវល្អ ដែលនាំឱ្យការបញ្ជាទិញទំនិញពីកម្ពុជាត្រូវកាត់បន្ថយ។ ភាគច្រើននៃទំនិញដែលកាណាដាទិញពីកម្ពុជា គឺជាផលិតផលវាយនភណ្ឌ កង់ និងគ្រឿងបង្គុំអេឡិចត្រូនិក។ កម្ពុជាជាប្រទេសផលិត និងផ្គត់ផ្គង់ ដូច្នេះបើការបញ្ជាទិញធ្លាក់ចុះ ទឹកប្រាក់នាំចេញរបស់កម្ពុជានឹងធ្លាក់ចុះទៅតាមនោះដែរ។
ទាក់ទងការនាំចូលទំនិញពីប្រទេសកាណាដា ដែលបន្តកើនឡើងនោះ លោក លឹម ហេង ប្រាប់ថា គឺដោយសារសេដ្ឋកិច្ច និងតម្រូវការនៅកម្ពុជានៅតែមានដំណើរទៅមុខល្អ។
លោកប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែកក្កដាថា៖ «ដោយសារគុណភាពទំនិញកម្ពុជាត្រូវបានគេទទួលស្គាល់នៅទីនោះហើយ ដូច្នេះនៅពេលស្ថានភាពនយោបាយ និងសេដ្ឋកិច្ចពិភពលោកល្អឡើងវិញ គឺប្រាកដជាមានការបញ្ជាទិញច្រើន»។
លោកបន្ថែមថា ក្រៅពីទំនាក់ទំនងការទូតល្អជាមួយគ្នា ផ្នែកឯកជននៅកម្ពុជាដែលតំណាងដោយសភាពាណិជ្ជកម្មកម្ពុជា ក៏បានបើកការិយាល័យតំណាងរបស់ខ្លួននៅតូរ៉ុនតូ ដើម្បីផ្សព្វផ្សាយពីផលិតផលកម្ពុជា និងផ្តល់ព័ត៌មានដល់វិនិយោគិនកាណាដាឱ្យចូលមកវិនិយោគផ្ទាល់នៅកម្ពុជាផងដែរ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ និយាយថា ការធ្លាក់ចុះចំនួនប្រាក់ដែលកម្ពុជានាំចេញទៅកាណាដា គឺដោយសារតែការបញ្ជាទិញធ្លាក់ចុះ។ សម្ទុះការនាំចេញរបស់កម្ពុជានឹងកើនឡើងវិញនៅពេលវិបត្តិនានាពេលនេះបិទបញ្ចប់ទៅវិញ។
លោកប្រាប់ថា៖ «ភាពអវិជ្ជមាននៃកំណើនសេដ្ឋកិច្ចពិភពលោក បានធ្វើឱ្យពាណិជ្ជកម្មអន្តរជាតិមិនល្អឡើយ»។
ក្នុងឆ្នាំ ២០២២ ពាណិជ្ជកម្មទ្វេភាគីកម្ពុជាកាណាដា មានទឹកប្រាក់សរុប ១ ១៥៤,៤៧ លានដុល្លារ កើន ១៦,១ ភាគរយធៀបឆ្នាំ ២០២១ ដែលមានចំនួន ៩៩៤,៧២ លានដុល្លារ។ ក្នុងនោះកម្ពុជានាំចេញទំនិញទៅកាណាដា ១ ១២០,៥៩ លានដុល្លារ កើនឡើង ១៧,៤ ភាគរយ ចំណែកទំនិញកាណាដា នាំមកកម្ពុជា មានចំនួន ៣៣,៨៨ លានដុល្លារ ធ្លាក់ចុះ ១៥,១ ភាគរយ៕
