កម្ពុជាមានតំបន់សេដ្ឋកិច្ចពិសេសចំនួន ២៤ កន្លែងដែលកំពុងដំណើរការ និងបានបង្កើតការងារជាង ១៧៥ ពាន់កន្លែង។ លោក ជា វុទ្ធី អគ្គលេខាធិការរងគណៈកម្មការវិនិយោគកម្ពុជាបានឲ្យដឹងថា តំបន់សេដ្ឋកិច្ចពិសេសបង្កើតឡើងនៅឆ្នាំ២០០៥ ក្រោមការគិតគូរពីប្រមុខរដ្ឋាភិបាលក្នុងគោលដៅទាក់ទាញការវិនិយោគក្នុងការរួមចំណែកអភិវឌ្ឍហេដ្ឋារចនាសម្ព័ន្ធ និងសាកល្បងការធ្វើកំណែទម្រង់នីតិវិធីរដ្ឋបាលទាក់ទងការវិនិយោគ។ បច្ចុប្បន្នមានក្រុមហ៊ុនចុះបញ្ជីចំនួន ៦៥៥ ក្រោមទុនវិនិយោគ ៨.១ ពាន់លានដុល្លារ នៅក្នុងតំបន់សេដ្ឋកិច្ចពិសេសទាំង ២៤ កន្លែង ដែលកំពុងដំណើរការ។
លោក ជា វុទ្ធី បានអះអាងថា តំបន់សេដ្ឋកិច្ចពិសេសបានដើរតួនាទីយ៉ាងសំខាន់ក្នុងការធ្វើពិពិធកម្មសេដ្ឋកិច្ចកម្ពុជា ពិពិធកម្មឧស្សាហកម្ម និងការធ្វើពិពិធកម្មប្រភពទុនវិនិយោគពីបណ្ដាប្រទេសដទៃ។
លោកបន្ថែមថា ការនាំចេញពីឆ្នាំ ២០១១ ដល់ឆ្នាំ២០២២ ពីតំបន់សេដ្ឋកិច្ចពិសេសមានប្រមាណ ២៥ ពាន់លានដុល្លារ។ ឆ្នាំ ២០១១ ចំណែកការនាំចេញពីតំបន់សេដ្ឋកិច្ចពិសេសមានតែជាង ៤ ភាគរយនៅទូទាំងប្រទេស។ នៅក្នុងឆ្នាំ ២០២២ ចំណែកការនាំចេញបានកើនដល់ ២៣ %។
បើតាមលោក ជា វុទ្ធី នៅក្នុងតំបន់សេដ្ឋកិច្ចពិសេស វិស័យមិនមែនឧស្សាហកម្មកាត់ដេរ ស្បែកជើង និងសម្ភារៈធ្វើដំណើរមានជាង ៩០ ភាគរយ៕
