ឥណ្ឌាដែលជាប្រទេសឈានមុខគេ ក្នុងការនាំចេញអង្ករទៅកាន់ពិភពលោក បានសម្រេចបន្ថែមពន្ធដល់ ២០ ភាគរយលើការនាំចេញអង្ករសម្រូប ដែលការសម្រេចនេះនឹងត្រូវអនុវត្តភ្លាមៗ។
ការផ្លាស់ប្តូរនេះ នឹងអាចជះឥទ្ធិពលដល់តម្លៃអង្ករ ឬ បង្កើនតម្លៃអង្ករពិភពលោក ដែលធ្លាប់តែជួញដូរនៅក្បែរកម្រិតខ្ពស់បំផុតទៅហើយក្នុងរយៈពេល ១២ឆ្នាំចុងក្រោយ។
គួររំលឹកថា កាលពីខែកក្កដា កន្លងទៅ ប្រទេសឥណ្ឌា បានធ្វើឱ្យអតិថិជនរបស់ខ្លួនភ្ញាក់ផ្អើលម្តងរួចមកហើយ ដោយការដាក់បម្រាម ឬហាមឃាត់លើការនាំចេញអង្ករសទាំងស្រុង។
ដោយឡែក អ្នកលក់អង្ករម្នាក់ដែលមានមូលដ្ឋាននៅទីក្រុង បុមបៃ ប្រទេសឥណ្ឌា បាននិយាយថា ការរឹតត្បិតនេះបានជំរុញឱ្យអ្នកទិញ មួយចំនួនធំងាកមកទិញអង្ករជាប៉ាវៗ ឬ ទិញអង្ករស្តុកទុកក្នុងផ្ទះរបស់ពួកគេ ដ្បិតអីមានការព្រួយបារម្ភថា វានឹងធ្វើឱ្យតម្លៃរបស់អង្ករឡើងដល់កម្រិតខ្ពស់បំផុត។
ឈ្មួញដដែលនេះបានបន្តថា ការសម្រេចបន្ថែមពន្ធនេះ នឹងធ្វើឱ្យអង្ករសម្រូបរបស់ ឥណ្ឌា ឡើងថ្លៃខ្ពស់ដូចតែអង្ករដែលនាំចូលពីប្រទេស ថៃ និង ប៉ាគីស្ថានដែរ ហេតុនេះអ្នកទិញគឺគ្មានជម្រើសទិញអង្ករដែលមានតម្លៃទាបនោះទេ។
គួរជម្រាបថា កាលពីខែកក្កដា សន្ទស្សន៍តម្លៃអង្ករដែលចេញដោយទីភ្នាក់ងារស្បៀងអាហាររបស់អង្គការសហប្រជាជាតិបានហក់ឡើងដល់កម្រិតខ្ពស់បំផុតក្នុងរយៈពេលជិត ១២ ឆ្នាំកន្លងមកនេះ ដោយសារតម្លៃអង្ករនៅក្នុងប្រទេសនាំចេញសំខាន់ៗបានហក់ឡើងខ្ពស់ បន្ទាប់ពីប្រទេសឥណ្ឌា បានដាក់កំហិតលើការនាំចេញ។
គួរជម្រាបថា ប្រទេសឥណ្ឌា ក្តោបក្តាប់ចំណែកទីផ្សារនាំចេញអង្ករពិភពលោកប្រមាណជាង ៤០ ភាគរយ ព្រមទាំងមានតម្លៃពន្ធទាបជាង ប្រទេសនាំចេញដទៃទៀត។ ការណ៍នេះស្តែងឱ្យឃើញថា ការកាត់បន្ថយ ការនាំចេញពីសំណាក់ឥណ្ឌា អាចធ្វើឱ្យតម្លៃស្បៀងអាហារពិភពលោកកើនឡើង ឬ អតិផរណាកើនឡើង ស្រដៀងទៅនឹងផលប៉ះពាល់ ដែលបង្កមកពីការឈ្លានពានរបស់រុស្ស៊ី លើ អ៊ុយក្រែន ក្នុងឆ្នាំ ២០២២ ដូច្នេះដែរ។
ការទប់ស្កាត់ការនាំចេញទំនិញម្ហូបអាហារនាពេលថ្មីៗនេះបង្ហាញពីចេតណារបស់រដ្ឋាភិបាលរបស់នាយករដ្ឋមន្ត្រីលោក Narendra Modi នៅចំពោះមុខអតិផរណាស្បៀងអាហារពិភពលោកដែលកំពុងកើតឡើង និងនៅចំពោះមុខការបោះឆ្នោតសកលក្នុងប្រទេសឥណ្ឌា ដែលគ្រោងធ្វើឡើងនៅឆ្នាំ ២០២៤៕
