(អន្តរជាតិ)៖ ប្រធានាធិបតីចិន លោក Xi Jinping បានសម្តែងការប្តេជ្ញាចិត្តក្នុងការបន្តបើកទីផ្សារក្នុងស្រុក ដោយការបង្កើនកិច្ចសហប្រតិបត្តិការពហុជាតិ និងការពង្រឹងអំណាចរបស់ប្រទេសចិន ក្នុងការទាក់ទាញ មូលធនបរទេស។ នេះបើយោងតាមការចុះផ្សាយរបស់សារព័ត៌មានCNAនៅថ្ងៃទី ២៨ ខែកញ្ញា ឆ្នាំ២០២៣។
ទូរទស្សន៍ CCTV ដែលគ្រប់គ្រងដោយរដ្ឋបានរាយការណ៍ថា ការកត់សម្គាល់របស់លោកត្រូវបាន ធ្វើឡើង នៅក្នុងកិច្ចប្រជុំរបស់មេដឹកនាំកំពូលនៃបក្សកុម្មុយនិស្ត។
លោក Xi បានសង្កត់ធ្ងន់លើគុណសម្បត្តិរបស់ប្រទេសចិន ដែលបានចូលជាសមាជិក អង្គការពាណិជ្ជកម្មពិភពលោកក្នុងឆ្នាំ ២០០១ ដោយនិយាយថា ប្រទេសនេះបានក្លាយជាដៃគូ ពាណិជ្ជកម្មដ៏សំខាន់សម្រាប់ប្រទេស និងតំបន់ជាង ១៤០ហើយបានរួមចំណែកដល់កំណើន សេដ្ឋកិច្ចពិភពលោក។
លោកក៏បានបង្ហាញពីភាពខ្នះខ្នែងក្នុងការចូលរួមក្នុងកិច្ចព្រមព្រៀងគ្រប់ជ្រុងជ្រោយ និងជឿនលឿន សម្រាប់ភាពជាដៃគូអន្តរប៉ាស៊ីហ្វិក ឬ CPTPP ដែលជប៉ុនជាសមាជិក។
សុន្ទរកថារបស់លោក Xi ដែលបានធ្វើឡើងនៅមុនវេទិកាខ្សែក្រវ៉ាត់ និងផ្លូវសម្រាប់កិច្ចសហ ប្រតិបត្តិការអន្តរជាតិនៅខែក្រោយនេះ ហាក់ដូចជាឆ្លុះបញ្ចាំងពីបំណងរបស់ប្រទេសចិន ក្នុងការកសាង សេដ្ឋកិច្ចដែលជាប់គាំងរបស់ខ្លួនឡើងវិញ។
លោក Xi បានរិះគន់ចំពោះវិធានការថ្មីៗរបស់សហរដ្ឋអាមេរិក ដើម្បីកំណត់ការនាំចេញទៅកាន់ ប្រទេសចិន ដោយលើកឡើងពីហេតុផលសន្តិសុខ។ លោកបានសង្កត់ធ្ងន់ពីតម្រូវការដើម្បីប្រឆាំងនឹងលទ្ធិគាំពារនិយម និងនយោបាយនៃបញ្ហាសេដ្ឋកិច្ច និងពាណិជ្ជកម្ម។
លោក Xi ក៏បានបង្ហាញពីចេតនារបស់លោកក្នុងការចូលរួមក្នុងការកែទម្រង់ WTO ដោយនិយាយថា លោកនឹងជំរុញយ៉ាងសកម្មការស្ដារឡើងវិញនូវប្រតិបត្តិការធម្មតានៃយន្តការដោះស្រាយជម្លោះរបស់ស្ថាប័នពាណិជ្ជកម្មពិភពលោក៕
