យន្តហោះដឹកអ្នកដំណើរ C919 ដែលផលិតដំបូងគេដោយក្រុមហ៊ុនសាជីវកម្មយន្តហោះពាណិជ្ជកម្មរបស់ប្រទេសចិន (COMAC) ដើម្បីប្រកួតប្រជែងនឹងក្រុមហ៊ុនយន្តហោះ Airbus និង Boeing ឥឡូវនេះបានហោះហើរចេញពីទឹកដីចិនដោយបានបង្ហាញខ្លួនលើកដំបូងនៅក្នុងប្រទេសសិង្ហបុរីនៅឯកម្មវិធីតាំងបង្ហាញ Singapore Airshow កាលពីចុងសប្តាហ៍មុន។
ប្រទេសចិនបានបង្កើនការវិនិយោគយ៉ាងច្រើនក្នុងការប៉ុនប៉ងបំបែកការកាន់កាប់ទីផ្សារយន្តហោះរបស់ក្រុមហ៊ុនផលិតយន្តហោះបស្ចិមលោកដ៏សំខាន់ចំនួនពីរ គឺក្រុមហ៊ុនអឺរ៉ុប Airbus និងក្រុមហ៊ុនអាមេរិក Boeing ដែលមានឥទ្ធិពលលើទីផ្សារយន្តហោះដឹកអ្នកដំណើរក្នុងពិភពលោក។ កាលពីឆ្នាំមុនប្រទេសចិនបានដាក់ឱ្យដំណើរនូវយន្តហោះដឹកអ្នកដំណើរ C919 របស់ខ្លួនចំនួន៤គ្រឿងជាលើកដំបូងក្នុងប្រទេសចិន ក្រោមប្រតិបត្តិការរបស់ក្រុមហ៊ុនអាកាសចរណ៍ China Eastern Airlines របស់ចិន។
ដោយឡែកនៅឆ្នាំនេះ ប្រទេសចិនបានបង្ហាញពីផែនការជំរុញបង្កើនការបោះជំហានរបស់យន្តហោះ C919 និងក្រុមហ៊ុន COMAC ទាំងក្នុងស្រុក និងអន្តរជាតិថែមទៀត។ ជាក់ស្ដែងកាលពីថ្ងៃអាទិត្យ ទី១៨ ខែកុម្ភៈ យន្តហោះរបស់ចិន C919 បានបង្ហាញខ្លួនជាលើកដំបូងនៅក្នុងប្រទេសសិង្ហបុរីក្នុងកម្មវិធីតាំងបង្ហាញ Singapore Airshow ដែលជាការបង្ហាញវត្តមាននៅក្រៅទឹកដីចិនជាលើកដំបូង។
ខណៈពេលដែលក្រុមហ៊ុន Airbus និងក្រុមហ៊ុន Boeing កំពុងប្រឹងប្រែងបង្កើនផលិតកម្មដើម្បីបំពេញតម្រូវការសម្រាប់យន្តហោះថ្មី ស្របពេលក្រុមហ៊ុន Boeing កំពុងប្រឹងប្រែងដោះស្រាយវិបត្តិជាច្រើននោះ វិស័យឧស្សាហកម្មអាកាសចរណ៍កំពុងសម្លឹងមើលពីរបៀបដែលក្រុមហ៊ុន COMAC អាចចូលខ្លួនមកជំនួសក្រុមហ៊ុនធំៗទាំង២នេះ។
ប្រព័ន្ធផ្សព្វផ្សាយរបស់ចិនបានរាយការណ៍ដោយដកស្រង់សម្ដីពីមន្ត្រីម្នាក់របស់ក្រុមហ៊ុនចិន COMAC ដែលបាននិយាយកាលពីខែមករាថា ក្រុមហ៊ុននេះនឹងវិនិយោគរាប់សិបពាន់លានយន់ក្នុងរយៈពេល៣-៥ឆ្នាំខាងមុខ ដើម្បីពង្រីកសមត្ថភាពផលិតយន្តហោះ C919 របស់ខ្លួន៕
