(ញូវដែលី)៖ កាលពីថ្ងៃសុក្រសប្តាហ៍នេះ ឥណ្ឌាបានចាប់ផ្តើមបណ្តេញជនភៀសខ្លួនមីយ៉ាន់ម៉ាក្រុមដំបូងគេ ដែលបានមកស្វែងរកការជ្រកកោននៅទីនោះ បន្ទាប់ពីកើតមានរដ្ឋប្រហារយោធានៅឆ្នាំ២០២១ ហើយគ្រោងនឹងបញ្ជូនទៅវិញ បន្ថែមទៀត ក្នុងពេលប៉ុន្មានថ្ងៃខាងមុខ ក្រោយឥណ្ឌាបានប្រកាសថា នឹងបិទបញ្ចប់គោលការណ៍ធ្វើដំណើរដោយមិនចាំបាច់មានទិដ្ឋាការ នៅតំបន់ព្រំដែនជាមួយមីយ៉ាន់ម៉ា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសៅរ៍ ទី៩ ខែមីនា ឆ្នាំ២០២៤។
ជនស៉ីវិលរាប់ពាន់នាក់ និងទាហានរាប់រយនាក់មកពីមីយ៉ាន់ម៉ា បានរត់ភៀសខ្លួនទៅកាន់បណ្តារដ្ឋរបស់ឥណ្ឌា ជាហេតុបង្កឱ្យទីក្រុងញូវដែលី មានការព្រួយបារម្ភ។ អាជ្ញាធររដ្ឋ Manipur ភាគឦសានឥណ្ឌា ជាប់ព្រំប្រទល់មីយ៉ាន់ម៉ា បានប្រកាសថា «ក្រុមដំបូងនៃជនជាតិមីយ៉ាន់ម៉ា ដែលបានចូលមកក្នុងប្រទេសឥណ្ឌាដោយខុសច្បាប់ ត្រូវបានបណ្តេញចេញទៅវិញ នាថ្ងៃនេះ»។ រដ្ឋ Manipur គ្រោងបញ្ជូនជនភៀសខ្លួនយ៉ាងហោច៧៧នាក់ ត្រឡប់ទៅមីយ៉ាន់ម៉ាវិញ ដោយចាប់ផ្តើមពីថ្ងៃសុក្រសប្តាហ៍នេះ។
គួរបញ្ជាក់ថា ឥណ្ឌាមិនបានចុះហត្ថលេខាលើ អនុសញ្ញាជនភៀសខ្លួនឆ្នាំ១៩៥១ របស់អង្គការសហប្រជាជាតិឡើយ ដែលមានចែងអំពីសិទ្ធិរបស់ជនភៀសខ្លួន និងការទទួលខុសត្រូវរបស់ប្រទេសនីមួយៗ ដើម្បីជួយការពារពួកគេ ហើយប្រទេសឥណ្ឌាផ្ទាល់ ក៏មិនមានច្បាប់ស្តីអំពីការការពារជនភៀសខ្លួនដែរ។ កាលពីខែកុម្ភៈ ឥណ្ឌាបានប្រកាសថា ខ្លួននឹងបញ្ចប់គោលការណ៍ធ្វើដំណើរដោយសេរីជាមួយមីយ៉ាន់ម៉ា សម្រាប់ប្រជាជនរស់នៅតាមតំបន់ព្រំដែន រវាងប្រទេសទាំងពីរ ដែលបានអនុវត្តរាប់ទសវត្សរ៍មកហើយ ក្រោមហេតុផលរួមមានទាំងបញ្ហាសន្តិសុខជាតិ បន្ទាប់ពីប៉ុន្មានថ្ងៃមុនសេចក្តីប្រកាសនោះ រដ្ឋមន្រ្តីមហាផ្ទៃឥណ្ឌា បានប្រកាសអំពីគម្រោងសាងសង់រនាំង នៅតាមបណ្តោយព្រំដែនប្រវែង១,៦៤៣គីឡូម៉ែត្រ ជាមួយមីយ៉ាន់ម៉ា៕
